ՀՀ կառավարության այսօրվա նիստում հաստատվեց 2018 թվականի պետական բյուջեի նախագիծը:


ՀՀ ֆինանսների նախարար Վարդան Արամյանը, կառավարության նիստում ներկայացնելով հաջորդ տարվա պետբյուջեի մակրոտնտեսական կանխատեսումները, նշեց, որ կառավարությունն իր կանխատեսումներում բարձրացրել է տնտեսական աճի ցուցանիշը:

«2017 թվականի բյուջեով մենք ամրագրել էինք 3.2 տոկոս տնտեսական աճ, բայց տնտեսական ակտիվության ցուցանիշը, որը ներկայումս 5.5 տոկոս է, և բոլոր ճյուղային զարգացումները փաստում են, որ մեր տնտեսական աճը կգտնվի 4-4.8 տոկոսի միջակայքում: Եվ այդ հենքի հիման վրա մենք բարձրացրել ենք գործող սպասումները 4.3 տոկոս այս տարի: Այսպիսով, հաջորդ տարվա համար մենք կանխատեսում ենք 4.5 տոկոս տնտեսական աճ»,- նշեց ֆինանսների նախարարը:

Վարդան Արամյանն ասաց, որ 2018 թվականին նախատեսում է ընդամենը 2.2-2.5 տոկոսի շրջանակներում ընթացիկ ծախսերի աճ: Փոխարենը, ըստ նրա, կառավարությունը շեշտադրում է կատարել կապիտալ ծախսերի մասով:

«Մեզ անհրաժեշտ է, որպեսզի հավակնենք 5 և դրանից բարձր տնտեսական աճի, ուստի պետք է դրա հենքերը ստեղծել»,- ասաց նախարարը՝ հավելելով, որ նախորդ տարվա բյուջեով ավելացնելու են նաև պաշտպանական ոլորտի ֆինանսավորումը:

Այսպիսով, բարձրացվել են կապիտալ ու պաշտպանական ծախսերը, մասնավորապես, կապիտալ ծախսերին կուղղվի 175 միլիարդ դրամ՝ 2017-ի 95 միլիարդի փոխարեն, իսկ պաշտպանության ծախսերին՝ 246,8 միլիարդ դրամ՝ այս տարվա 209,8 միլիարդի փոխարեն, 37 միլիարդ դրամով ավելի:

Վարդան Արամյանը նաև հայտնեց, որ բյուջեի ծախսերի մասով կառավարությունն ավելի պահպանողական վարքագիծ է որդեգրում: Հաջորդ տարվա բյուջեի նախագծով նախատեսվում է 1 տրիլիոն 247.9 մլրդ դրամ հարկային եկամուտների հավաքագրում:

2018 թ-ի պետական բյուջեով ծախսերը կկազմեն 1 տրիլիոն 464.2 մլրդ դրամ, կապիտալ ծախսերը՝ 175 մլրդ: Ինչ վերաբերում է պակասուրդին, այստեղ ևս կառավարությունը զսպված վարքագիծ է դրսևորելու. ՀՆԱ-ի մեջ պակասուրդը ծրագրված է 2.7 տոկոս և այն կլինի 156.9 մլրդ դրամ:

Նյութը հեղինակային է և պաշտպանված օրենքով