Փետրվարի 12-ին Երեւանում տեղի կունենա «Հարկային համակարգ, արդարություն ու տնտեսական զարգացում» միջազգային համաժողովը, որի ընթացքում կքննարկվեն Հայաստանում սպասվող հարկային բարեփոխումները` միջազգային փորձի համատեքստում։
Համաժողովի առանցքային թեմաներից կլինեն եկամտահարկի պրոգրեսիվ և համահարթ համակարգերի համեմատական վերլուծությունը, ինչպես նաև հարկման, անհավասարության և տնտեսական զարգացման միջև եղած փոխադարձ կապը։
Համաժողովին կմասնակցեն բարձրաստիճան հյուրեր Մակեդոնիայից, Գերմանիայից, Սլովակիայից, Վրաստանից և այլ երկրներից։
Կազմակերպիչները Երեւանում կհյուրընկալեն Մակեդոնիայի Հանրապետության ֆինանսների նախարար Դրագան Թևդովսկուն, Գերմանիայի Հյուսիսային Հռենոս-Վեսթֆալիա երկրամասի նախկին ֆինանսների նախարար պարոն Նորբերտ Վալտեր-Բորյանսին, Վրաստանի կառավարող դաշինքի պատգամավոր Բեկա Նացվլիշվիլիին, Սլովակիայի ֆինանսների նախարարի առաջին խորհրդական Անտոն Մարսինչինին և այլ պաշտոնյաների։
Նշենք, որ մեկօրյա համաժողովը կազմակերպել են Ֆրիդրիխ Էբերտ հիմնադրամը (Գերմանիա) և Քաղաքական դիսկուրս հանդեսը (Diskurs.am)։
Նյութը հեղինակային է և պաշտպանված օրենքով
