Դանիայի խոշորագույն բանկը՝ Danske Bank-ը, դադարեցնում է իր գործունեությունը Ռուսաստանի և Բալթյան երկրների տարածքում, հայտնում է  РИА «Новости»-ն հղում անելով  վարկային կազմակերպության մամուլի ծառայությանը: 
 
Փետրվարի 19-ին Էստոնիայի վերահսկող ֆինանսական մարմինը պահանջել է, որպեսզի Danske Bank-ի մասնաճյուղը երկրում 8 ամսվա ընթացքում դադարեցնի իր գործունեությունը:
 
Ինչպես հայտնել են բանկից՝ անկախ էստոնական կարգավորչի որոշումից՝ Danske Bank-ն իր ռազմավարությանը համապատասխան որոշել է դադարեցնել գործունեությունն Էստոնիայում, Լատվիայում, Լիտվայում և Ռուսաստանում, որպեսզի իր ուշադրությունը սևեռի Հյուսիսային Եվրոպայի շուկային:
 
 
Հաղորդվում է, որ աշխատանքը շարունակելու է միայն Լիտվայում գործող սպասարկման կենտրոնը, որն իրականացնում է մի շարք վարչական գործառույթներ:
 
Հիշեցնենք, որ Դանիայի իշխանությունները Danske Bank-ին  2018 թվականի նոյեմբերին 4 կետով մեղադրանք էր ներկայացրել՝  էստոնական մասնաճյուղի կողմից տարիների ընթացքում երկրի օրենսդրությունը  խախտելու վերաբերյալ:  Մեղադրանքը կապված է փողերի լվացման հետ:  Danske Bank-ի հաղորդագրության մեջ նշվում է, որ  մեղադրանքը ներկայացրել է Դանիայի միջազգային և տնտեսական ծանր հանցագործությունների գծով պետական դատախազը ՝  ֆինանսական կազմակերպության նկատմամբ  2018-ի  օգոստոսին սկսված հետաքննության արդյունքներով:  Մեղադրանքները վերաբերում են 2007 թվականի  փետրվարի 1-ից մինչև 2016-ի հունվարի վերջն ընկած ժամանակահատվածին:  Կասկածի տակ են հայտնվել Danske Bank-ի  էստոնական մասնաճյուղով իրականացրած  գրեթե բոլոր գործարքները՝ 200 միլիարդ եվրո ծավալով: